Kajfvn Ñi Nvxamkan ;; MARIÑAMKO

Famgeci nvxamkapey Kajfvn zoy pataka xipantu mew:

Nvxamkan Mariñamko

Feymew fentepun wezañmagerkefuy. Kiñe fvca wenxu puwvrkey. Kvpan, caw Mariñamko, pipurkey, ayvn may kiñe vjca zomo, pipurkey tvfici fvca. Feymew: cuci zomo?, pirkey Mariñamko. Fey may, pirkey tvfici fvca wenxu. Feymew we pirkey Mariñamco: kvpape tvfici zomo!, pigerkey tvfici zomo. Feymew kvparkey, kvpalu, akuy, piam. Feymew zvguleyew Mariñamko: tvfa, tvfaci fvca wenxu kureyeaeymew. Pinolmi kaxvñmaeyew mi logko, pigerkey tvfici vjca zomo. Cumten mu elay ñi mogeam tvfaxi fvca wenxu?, pigerkey tvfeyci zomo.

Ka abvn mew kvparkey kiñe kuse bafvtalu. Feymew: kvpan may, caw Mariñamko, pigeparkey. Feyvrke, pirkey Mariñamko. Cem zvgu, papay?, pirkey Mariñamko. Kvpan may bafvtan may, kizuyawi may kujin, piparkey tvfici kuse. Feymew kiñe wece wenxu ayvn ñi fvtayeyael, pirkey tvfici kuse. Feymew mvxvmfalgerkey tvfeyci wece wenxu. Feymew kvpay, piam, akuy, piam, Mariñamko mew, akulu. Tvfaci kuse ayvfiñ fvtayeafiel, pigerkey. Kureyeafimi. Cumtetulayay ñi mogen tvfaci wesa kuse, pirkefi tvfeyci wece wenxu. Feymew: pilan!, pi, piam, tvfici wece wenxu. Kureyenofilmi tvfaci kuse bagvmaeyu, pirkefi tvfeyci wece wenxu. Feymew kureyerkey tvfeyci kuse. Femgeci weza piwke nierkefuy em Mariñamko.

Vlkantun Mariñamko

Feymew kiñe logko mvlerkey

Mariñamko pigey.

Vlkaturkey:

Iñce Mariñamko pirkey

gacarin Fayukura mawiza mew

elgen pirkey

gacarin Fayukura mawiza mew

elgey Mariñamko kvla piwkegen.

Kiñe piwke bayafule

epu piwke mogeleay pirkey Mariñamko.

Feymew marici kuñilcerkelafuy

feymew kizu ñi kapitan bagvmturkeeyew

feymew balu wicafvgerkey

nentuñmagerkey ñi kvla piwke

feymew bay Mariñamko yem!

 

Rume afmatufal nvxam tati, kom rvfxipale kom rvfxipanole kam, Mariñamko nvxam mew pefali azmogen taiñ gvlamtuam, ñi azkafiel mew ta vjca egu fvca ka fey wece egu kuse wezakeci femvn pegekejey may, kimfali tati ñi wezañmagen petu inayenolu azmapu may.