KAJFVN ÑI EPEWVN :: Gvrv egu Pvxokiñ

Kajfvn, ka pigeci Segundo Jara, wecegefuy petu ñi xawvn Lenz egu, welu kvmeke ka fenxenke nvxam entukey, fey ka kvme kimniey ta cijkatugeyekayafuy kom ñi nvxam rupalu fenxen xipantu ñi zvguel rume, fey faw mvlepayiñ ahay Kajfvn!

Facike epew mu mvley kiñeke hemvl ta cem hemvlkawe no rume kintugejenolu, welu faw mu fenxen gvlvmgekey: Xarintukun. Fey ka 2021 xipantu mu pvzvmkean kiñe hemvlkawe cew ñi mvleal kay.

Tvfa mew pvvmkeafiñ epu zvgu: ci Kajfvn ñi tukulpan zvgu ka kiñe epew ta epu rupa wirikelu Lenz ñi cijka mew, tati gvrv egu pvxokiñ, afmatuenew ta mojfvñkeci afpeyvm fey kay ci xanaleci kimvn tañi entukeel, ayvwkeci cijkatujeaymvn!

Kajfvn, afci mari ayja siqlo

Kajfvn ñi pvci tukulpan zvgu

Kopiñ koñigen, tañi caw kaxvñ pigey, ñi ñuke Rupayjag pigey. Pvcvn hopan ta Kawtvn. Kvme wenxugefuy tañi caw em; feymew kureyey Lemunaw tañi ñawe. Abvn mew xewagetuy tañi caw; feymew konpatuy tañi pu gijañ mew, Kajfvkura mew. Feymew mvletuy; fey tvfa feley. Epu xipantu mew xipapan tañi caw mu. Feymew mvlepan tvfaci kawajero mew.

Kvmey ga zuamfiñ zvgu; feymew kimvn cijkatun. Petu mvlen ruka tañi caw mew, kimelenew Namunkura. Kimmey Kolvpvji cijkatun; fey kimelpatuenew kay. Feymew pvci kimvn piken iñce Kajfvn. Inarumefiel mew zvgu ajkvtufiñ cem pimekey ce; ajkvtufiñ, feymew kimvn piken. Epewi ce, ajkvtun; feymew kimvn epewvn.

Kvme wenxu kvpan iñce; Lemunaw em ñi cezki iñce, Kajfvkura ñi cokvm iñce, Ordike ñi cokvm iñce, Kuzvage ñi laku iñce.

Epew Gvrv kiñe Pvxokiñ egu

Feymew kuzeyu ahay pvxokiñ, pigerkey pvxokiñ.

Ya, pirkey, cem kuzeayu, pirkey.

Kawej kuzeayu, pirkey gvrv, eymi pu amuaymi, iñce wente mapu amuan, pirkey gvrv.

Ya, pirkey pvxokiñ.

Tvyeci koyam mew puwayu, pirkey gvrv.

Ya, pirkey pvxokiñ.

Feymew tuwvltuwvltuygu, feymew xipayalu ñi lef gvrv, pvxokiñ pvnantukukvnufemvrkey kvlel gvrv mew. Feymew amuy, piam, ñi lef gvrv. Tiyew pvle petu bewfv pepuy, piam, jaweñ. Tvfa mew pvci ijaweñkvnuci, pirkey gvrv, cew cey kvpalu weza pvxokiñ?, pirkey. Feymew ijaweñpurkey gvrv. Feymew, ka pvci abvn mew puwkvnukaci ahay, pirkey gvrv. Feymew epe epe puwlu lef xipafempurkey pvxokiñ, feymew wewgerkey gvrv.

Eluen ñi rag, pirkey pvxokiñ.

Pilan, ilotukeliyu!, pigerkey pvxokiñ.

Feymew wixakonarkey pvxokiñ, pataka, epu pataka, kecu mari, kayu mari, akunkefemvrkey pvxokiñ. Feymew bompuñmagerkey. Feymew bagvmtvkugerkey. Mogelen rulmey, piam, feymew mogeleci pvxokiñ vnaturkeeyew pu pvxa.

Feymew ko mew amuy, piam, vxvftvkupuy pu ko, feymew vnatuniekaeyew pvxokiñ, feymew ka amurkey lemu mew, feymew lemu bagvmgerkey.

Epew Gvrv egu Pvxokiñ

Pegerkey pvxokiñ, perkeeyew gvrv.

Kuzeayu ahay pvxokiñ, pirkey gvrv.

Ya, pirkey pvxokiñ, cem kuzeayu?, pirkey.

Kawej kuzeayu, pirkey gvrv.

Ya, pirkey pvxokiñ.

Eymi pu mapu amuaymi, iñce wente mapu amuan, pi, piam, gvrv.

Ya, pirkey pvxokiñ.

Tiyeci fvta koyam mew wixapuayu, pirkey gvrv.

Ya, pirkey pvxokiñ.

Fey ñi xipayanle lef lef gvrv, pvnantukulu kvnufemi, piam, kvlel ñi relmu pvxokiñ. Amuy, piam, gvrv, fentepun lefi, piam, tiyew pvle mvte pey, piam, jaweñ. Puci ijaweñkvnuci ahay, pi, piam, gvrv. Femi, piam. Felepukey, cew ci kvpalu weza pvxokiñ?, pirkey, piam, gvrv.

Ijaweñkey, piam, gvrv, pvnakonkvley, piam, kvlen mu pvxokiñ. Puwkvnukaci ahay, wewkvnufici weza pvxokiñ, pi, piam, gvrv. Leffuy, piam, fentepun lefi, piam, gvrv.

Tiyew pve pey, piam, jagjag, pvci ijagjagkvnici ahay, pi, piam, gvrv. Feymu, piam, ijagjagi, puwpuwpukvnukaci ahay, pi, piam. Amuy, piam, lef gvrv, epe xipawpulu.

Wiq!, pi, xipapuy pvxokiñ. Wiqkerkelewi ñi wvh leflu gvrv. Wewgey, piam, gvrv.

Weweyu ahay gvrv, pigey, piam, eluen ñi wew, pigey, piam, gvrv.

Pilan, bagvmketueliyu weza pvxokiñ, pi, piam, gvrv.

Feymew pvxokiñ, piam, xipay ñi wicakonayael. Akuy, piam, pvxokiñ, epuke pataka, kvlake pataka, melike pataka wej kayuke pataka. Bompuñmagey, piam, gvrv, talqamniey, piam, gvrv, Mogelen rumelyey, piam, feymew pu pvxa, piam, vnatugey ka. Feymew lefmawi, piam, amuci ko mew! Amuci ko mew!, pi, piam, puwi, piam, ko mew, vxvftukupuy, piam, ko mew. Bompuñeyew, piam, pvxokiñ, epe vrfifuy, piam, gvrv, ko mew. Feymew weyeb xipay, piam, ko mew, lemu mu amuci! Lemu mu amuci!, pi, piam, gvrv. Leffuy, piam, zoy pvxokiñ, piam, bompuñmaeyew, inaltu lemu puwlu bay, piam, gvrv, bagvmeyew pvxokiñ.